عزیز آذربایجان میللتی و آذربایجان اوجاغینین دَیَرلی اویهلری؛
آذربایجان میللی حوکومتینین قورولوش ایل دؤنومو موناسیبتی ایله بیرینجی قورولتایینین آردیندان 2023 ایلی، آذر آیینین 21-نده یارادیلدیغینی دویوردوغوموز آذربایجان دموکراسی و توسعه اوجاغی، کئچن ایکی ایلدن چوخ سورهده آذربایجانلیلاری تمثیل ائتمک، حاق و حوقوقلارینی الده ائتمک و میللتیمیزین آرزو ائتدیگی آیدین بیر گلهجگی اینشا ائتمک اوغروندا الیندن گلدیی قدر چالیشمیش و بو اوغوردا اؤنملی باشاریلار الده ائتمیشدیر. شوبههسیز، بوتون بو سوره ایچینده هر ساحهده و بوتون ایش و اَمَکلریمیزده هر نه قدر وطن و میللتیمیزین چیخارلاری بیرینجی اؤنجهلیگیمیز اولسا دا، البته کی ایستهمهدن سهولریمیز و آخساخلیقلاریمیز دا اولموشدور. بو حاقدا بوتون آذربایجانلیلار و اویهلریمیزدن گلن تنقیدلر و آلقیشلار اَن گوجلو یول گؤسترنیمیز اولموشدور.
ایندی ایسه اَلده ائتدیگیمیز بو تجروبهیه دایاناراق گلهجک ایللره داها گوجلو و داها امین آددیملار ایله داوام ائتمک ایستیریک. بو آماج ایله و اوجاغیمیزین قورولوش سندلرینه دایاناراق ایکینجی قورولتاییمیزی کئچیرمک ایستیریک. یئنی قورولتایدا اوجاغیمیزین قورولوش سندلری و مرکز شورا اویهلری یئنیلهنهجک، گرکلی اولارسا قورولوش مقصدلری و بوندان سونراکی یول خریطهمیز گؤزدن کئچیریلهجکدیر.
ایکینجی قورولتاییمیز 2026 ایلی آپریل آیینین 18-نده گرچکلشهجکدیر. آذربایجانین مختلف شهرلرینده اولان عضولریمیزله بیرلیکده، اؤلکه خاریجیندهکیلر برلین، استکهلم، پاریس، ونکوور، لسآنجلس… شهرلرینده بیر آرایا گلهرک و آرالاریندا ویدئو-کنفرانس شکلی ایله قورولتایا قاتیلابیلهجکلر.
عزیز اویهلر و سمپاتلار!
لوطفاً قورولتای گونونه قدر اوجاغیمیزین سندلری، تشکیلاتلانماسی، آماج و یول خریطهسی حاققیندا گؤروش و دوشونجهلرینیزی اوجاغیمیزا گؤندرین. اوجاق مرکز شوراسی و یا نیظارت کمیتهسی اوچون، اؤزونوز و یا بیر باشقا عضووموزو آدای ائتمک ایستهییرسینیزسه، علاقه واسیطهلری ایله بیزه بیلدیرین.
دَرین سایغیلاریمیز ایله،
اوجاق- مرکز شوراسی
@azdemorg
11.04.202
